Mulsanne هيّي من السيارات الفاخرة والقويّة يلّي أنتجتا Bentley إعتباراً من سنة 1980، علماً إنّو هالإسم مستوحى مباشرة من تاريخ Bentley العريق، وتحديداً من جزء من حلبة سباق 24 ساعة Le Mans، يلّي فازت فيا هالشركة البريطانية خمس مرّات بين سنة 1924 و1930. وبعد توقّف الإنتاج سنة 1992، رجعت Mulsanne للأسواق إعتباراً من العام 2010. ونسخة 2014، خضعت لمجموعة من التحسينات والتعديلات يلّي بتدلّ إنّو ما في حدود للفخامة وللترف، خاصة إنّو عم نحكي عن سيارة بتنافس Rolls Royce Phantom و Maybach 57، ومش سيارات Luxury من إنتاج Mercedes أو BMW مثلاً.  

وبالنسبة للتصميم، فهوّي متمسّك بالتراث بشكل واضح كتير، مع أشكال من وحي الماضي، ولكن ضمن هيكل جديد بأكّد الإنتماء لسيارات Sedan الفخمة جداً، وبيمنح هال Limousine كل الهيبة والرصانة المطلوبة بفئتا. ومن الممكن الحديث عن خطوط إنسيابيّة، بالرغم من القياسات الكبيرة، ومن الشكل الثلاثي الأحجام أو ال Three Volume التقليدي. ومن ضمن التحسينات الخارجية، ألوان مستحدثة وجديدة.

وبالإنتقال لل Cabin، الفخامة كتير عالية، وبتتمثّل بأهمّ أنواع الخشب والكروم والجلد، وباهتمام كتير كبير بالتفاصيل وبعمليّة تجميع المكوّنات أو ال Components. وكل نسخة من Mulsanne بتستفيد من 170 ساعة عمل يدوي حِرَفي لإتمام تفاصيل وجمال ال Cabin. وهالشي بيشمل زينة من الخشب الفاخر، وخياطة حلوة لل Leather وللسجاد بالأرض. ومن ضمن أعمال التطوير، مساند راس أو Headsets كتير عمليّة بتزيد من راحة الجلوس، ودعسات لراحة القدم أو Footrests جداد. وصارو المقاعد مزوّدين بريش البطّ لزيادة مستويات ال Comfort. ومن الممكن الإستفادة من ستاير خلفية بتأمّن الخصوصية التامة، مع تحكم كهربائي سهل، من قبل السايق أو من قبل ركاب المقاعد الخلفيّة.  

وعلى مستوى ال Features، كل تجهيزات الترفيه موجودة، متل نظام الموسيقى يلّي بيستفيد من 14 مكبّر صوت و MP3، مع إمكان إختيار Audio System بطاقة 2200 Watts مع 20 Speakers إضافياً. وتجهيزات الترفيه بتتضمّن شاشة بتشتغل باللمس قياس 8 "إنش". والأهم إنّو تمّ تزويد ظهر المقاعد الأمامية ب iPads وب Wireless Keyboards مع Web Connectivity. وألواح التحكم اللاسلكية بتنضبّ بطريقة مميّزة في حال عدم إستعمالا. ومن بين ميزات Mulsanne مجموعة من الحقائب المتناسقة والفاخرة بالصندوق. 

بالنسبة للمحرك، عم نحكي عن 6,75 Liter V8 بولّد 505 أحصنة، كفيل بتأمين أداء كتير قوي ونشيط بمساعدة ZF Gearbox أوتوماتيكية من 8 نسب، علماً إنّو وزن هالسيارة الفخمة كتير، بيبلغ 2565 كيلوغرام. 

بالختام، الأكيد إنّو Bentley Mulsanne صارت أفخم من أّيّا وقت بالسابق، من دون ما تتنكّر لتاريخا العريق. وهيّي بتستهدف كل شخص بحب يستمتع بالفخامة البريطانية العريقة، ويلّي بيملك الإمكانات المالية لشراء هال Luxury المميّزة.