بنهاية سنة 2002 خاطرت Porsche بتقديما SUV بإسم Cayenne، بالوقت يلّي كانت معروفة بتخصّصا بإنتاج السيارات الرياضية بامتياز حصرياً. لكن النجاح الضخم يلّي حقّقو Cayenne دفعا لتقديمو بمجموعة واسعة من الفئات. واليوم، شافت Porsche إنّو الوقت صار مناسب لتقديم "شقيق صغير" إذا فينا نقول، هوّي Macan يلّي بنافس ضمن فئة Crossover الصغيرة على مستوى القياسات. وهال Compact  Crossover رحّ يتوفّر من البداية بفئة S وبفئة Turbo إضافة لفئة Diesel، علماً إنّو بيستفيد من مكوّنات مشتركة مع Audi Q5، ومع Cayenne بطبيعة الحال.

تصميمياً، بيتمتّع Porsche Macan بشبه كبير ب Cayenne، مع إنّو أصغر منّو بمقدار 17 Cm على مستوى الطول. والواجهة الأمامية بتأكّد الإنتماء لعَيلة سيارات Porsche، وبتتميّز بطابع رياضي بفضل شبكة التهوية أو ال Grill الكبير. ومن الجوانب الخطوط سلسة وإنسيابية، مع بعض التموّجات يلّي بتأمّن الطابع الرياضي المطلوب، خاصة أسفل الأبواب. ومن الجهة الخلفيّة، النَفس الديناميكي حاضر بقوّة، إنّ من خلال الجناح أو ال Wing يلّي بأمّن ال Downforce المطلوبة على السرعات العالية، أو من خلال عاكس الهوا أو ال Diffuser وال Exhaust يلّي بيستفيدو من حجم كبير ومن شكل جريء. وبالنسبة لل Lamps قدّام وورا، فهنّي بيتمتّعوا بشكل عصري وجذّاب، وبأمّنوا إنارة فعّالة كتير على الطريق.

بالإنتقال لداخل ال Cabin، فهيّي ما بتقلّ فخامة وجاذبية مقارنة بباقي سيارات Porsche الجديدة، مع توفير مساحات كافية لجلوس خمس ركّاب، علماً إنّو سعة الصندوق بتبلغ 500 ليتر، ومن الممكن رفعا ل 1500 ليتر إذا كان في ضرورا لهالشي. وبيتمتّع ال Dashboard بشكل رياضي واضح، مع بروز ال Console الوسطي، لجهة تعدّد ال Buttons وأزرار التحكّم الإلكترونية. ومتل العادة مع كل سيارات Porsche، بتستفيد مقصورة Macan من مجموعة كبيرة من تجهيزات الفخامة والراحة والسلامة، وقسم كبير منّا بيتوفّر كتجهيزات قياسية أو Standard Features بينما قسم قليل منّا بينطلب إضافياً.

ميكانيكياً، وإضافة لمحرك Diesel يلّي ما بيتوفّر بأسواقنا، من الممكن إختيار Macan بفئة S المزوّدة ب V6 Engine بسعة 3 ليترات، بولّد 340 حصان، علماً إنّو معدل إستهلاكو للبنزين بيبلغ 9 ليترات بسّ لكل مية كيلومتر.

أمّا الفئة Turbo من Macan فهيّي بتستفيد من 3,6 Liter V6 بولّد 400 حصان، مع حد أقصى للعزم أو ال Torque بيوصل لحدود 550 "نيوتن متر"، علماً إنّو نسبة الإستهلاك أو ال Consumption  بتبلغ حوالى 9,5 ليتر لكل مية كيلومتر.

ال Gearbox من فئة DSG يعني مزوّدة ب تِنان Clutch بهدف زيادة سرعة الإنتقال بين نسبة ونسبة، ومنع الهدر. وبتنقل هال Transmission يلّي بتستفيد من سبع نسب، القوة المستخرجة من المحرك لنظام دفع بالإطارات الأربعة. وهال All-wheel-drive System مجهّز بنظام تحكّم إلكتروني متطوّر، ببدّل توزيع ال Torque على الإطارات الأربعة، حسب الحاجة.

وبالنسبة للأداء، وبالرغم من إنّو وزن Macan بيبلغ تقريباً 2000 كيلوغرام، مع إحتساب وزن السايق، فهو رياضي بامتياز. ومثلاً التسارع من صفر لمية كيلومتر بالساعة بتمّ خلال 5,1 ثانية مع الفئة S، وخلال 4,6 ثوان مع الفئة Turbo. وبالنسبة للسرعة القصوى ل Macan S فهيّي بتبلغ 254 كلم/س. بينما بترتفع ال Maximum Speed لحدود 266 Km/h مع Macan Turbo.

ومع هيك قوّة، كان من الضروري تطوير نظام كبّح فعّال، بيستخدم أسطوانات كبيرة مع ABS و EBD لمنع الإنزلاق، ولتوزيع ضغط ال Braking بطريقة مِنسّقة وبتحكم إلكتروني. وبالنسبة لل Wheels الخفاف والمَتِينين، فهنّي قياس 18 أو 19 إنش، حسب الفئة، مع إطارات رياضية بطبيعة الحال.

ولتحسين الثبات والتماسك بمختلف ظروف القيادة، تمّ تطوير ال Suspensions يلّي بيستخدمو أنظمة هيدروليكية بتشتغل بضغط الغاز لإمتصاص تموّجات Body السيارة يلّي بيبلغ إرتفاعا عن الطريق متر و93 سنتيمتر. ومن الممكن إضافياً إختيار Suspension بتشتغل بضغط الهوا، وبتسمح بتعديل الإرتفاع بمقدار 4 سنتيمترات. وما بِخلِت Porsche على Macan بالنسبة للأنظمة الإلكترونية يلّي بتمنع الإنزلاق وبتضبط التوازن العام، متل PSM و PTM وغيرا.

بالختام، من الضروري التذكير إنّو Porsche إستثمرت مبلغ تجاوزت قيمتو ال 650 مليون دولار أميركي لتطوير مصنع Leipzig الألماني المشهور، ليكون قادر على إنتاج Macan Crossover الجديد كلياً، بشكل كتير فعّال وناجح. ومع Macan، عم تستهدف Porsche فئة جديدة من المستهلكين أو ال Customers يلّي بتحبّ سيارات SUV العمليّة والمريحة، ويلّي بتتمتّع بالفخامة والتطوّر التقني إضافة لقوّة الأداء، لكنّا بتفضّل الحجم الصغير نسبياً. وبحسب المعطيات الحالية، الأكيد إنّو مصير رهان Porsche الجديد على Macan، رح بكون مشابه لنتيجة رهانا السابق على Cayenne... يعني نجاح كتير كبير!